Baro 5-ta Fure ee Risqigaaga Barakeeya!”
Ereyga Barako macnihiisu waa “Kordhid, dhisid, iyo joogtaynta khayrka”. Waa awood rabbaani ah oo ka dhigta wax yar inay wax weyn qabtaan. Waxaad arki kartaa qof mushaarkiisu yaryahay laakiin gurigiisu nabad yahay, carruurtiisu caafimaad qabaan, haddana wax u dhiman ama ka maqna aysan jirin. Halka qof kale oo malaayiin qaata uu dareemayo cariiri iyo dhibaato aan dhammaad lahayn
1. Furaha Koowaad: At-Taqwa (Alle ka cabsiga)
Alle (SWT) wuxuu ballan-qaaday in qofkii ka baqa uu u furi doono ilo risqi ah oo uusan marnaba filayn. Barakadu ma ahan xisaab (1+1=2), ee waa naxariis Alle. Marka aad ka fogaato xaaraanta, Alle wuxuu xalaashaada yar ku barakeeyaa sidii ay u badanaan lahayd
2. Furaha Labaad: Al-Istighfaar (Dambi dhaaf weydiisiga)
Noloshu haddii ay kugu adkaato, risqi-guna uu ciriiri noqdo, fiiri dambiyadaada. Istiqfaartu ma ahan kaliya dambi dhaaf, ee waa furaha roobka, maalka, iyo ubadka. Sida ku xusan suuradda Nuux: “…waxaan ku niri dambi dhaaf weydiista Rabbigiis… wuxuu idiinku kordhin doonaa maal iyo ubad.”
3. Furaha Saddexaad: As-Sadaqah (Bixinta)
Xisaabta bini-aadamka, haddii aad haysato 100 oo aad bixiso 10, waxaa kuu haraya 90. Laakiin xisaabta barakada, bixinta sadaqadu ma dhinto maalka, balse waxay u tahay “tallaal” ka ilaaliya inuu xumaado ama kaga baxdo dhibaato. Sadaqadu waxay soo jiidataa naxariista Alle.
4. Furaha Afraad: Bukra Kallahaadda
Nabigeenna (NNKH) wuxuu ku duceeyey: “Ilaahayow u barakee umaddayda kallahaadooda.” Shaqada la qabto subaxii hore, kadib salaadda subax, waxay leedahay barako ka duwan tan la qabto duhurnimada. Hurdo badan ma keento barako; firfircoonida subaxdii ayaa ah sirta guusha.
5. Furaha Shanaad: A-Shukr (Mahadnaqa)
Qaanuunka barakada ee ugu weyn waa: “Haddii aad mahadnaqdaan, waxaan idiinku kordhin doonaa (nimcada).” Marka aad ku qanacdo waxa aad haysato, Alle wuxuu kaaga dhigaa mid kughu filan, wuxuuna kuugu kordhiyaa si tartiib-tartiib ah.
Gunaanad: Ha raadin “badnaan” adigoo barakadii luminaya. Risqigu ma ahan kaliya lacag; waa caafimaad, waa ubad khayr qaba, waa xaas/seey kula fahma nolosha, waana nabadgelyo. Barako la’aantu waxay u egtahay weel daloolsan oo wax kasta oo lagu shubo ay ka baxayaan. Maanta ka bilow inaad istiqfaarta badiso si aad u aragto mucjisada barakada.
