10 Qof oo Allah u caroodo (Iska ilaali inaad ka mid noqoto).
Xusuusinta dadka waxyaabaha keenaya carada Alle (SWT) waa mid ka mid ah tilmaamaha qofka Muslimka ah inuu ka taxadaro ay waajibka tahay. Carada Alle ma aha mid la fududaysan karo, waayo waxay horseedaa barako la’aan adduunka ah iyo ciqaab aakhira.
1. Qofka Shariig u yeela Alle
Tani waa dambiga ugu weyn ee uusan Alle cafiyin haddii aan laga toobad keenin. In cid kale la caabudo ama la rumeeyo inay awood leedahay iyadoo lala barbar dhigayo Alle.
2. Qofka Waalidkiis Caasiya
Carada Alle waxay ku jirtaa carada waalidka. Qofka dhibsada, caaya, ama dayaca waalidkiis wuxuu mudanayaa caro degdeg ah oo adduunka kaga bilaabata.
3. Qofka Dadka Isku Dir (Namiim)
Qofka hadalka u kala qaada dadka si uu isugu diro ama u dhex dhigo colaad. Nabigu (NNKH) wuxuu sheegay in qofkaas uusan jannada gelayn, carada Allena ay dusha ka saaran tahay.
4. Qofka isla Kibirsan (Is-weyneeya)
Alle wuxuu u caroodaa qofka is-weyneeya ee dadka kale quudhsada. Kibirku waa sifo uu Alle iska leeyahay (Al-Mutakabbir), qofkii isku daya inuu kula tartamana wuxuu mudanayaa caradiisa.
5. Qofka Dadka Dulmiya
Hadday ahaan lahayd in hantidooda la dhaco, in lagu xad-gudbo sharaftooda, ama in la dhibo dadka daciifka ah. Ducada qofka la dulmiyay iyo Alle uma dhexeyso wax xijaab ah hore ayuu ka aqbalaa
6. Qofka Agoonta Xoolahooda Cuna
Alle wuxuu si adag ugu hanjabay dadka cuna hantida agoonta. Waa mid ka mid ah dambiyada burburka keena ee carada Alle lagu kasbado.
7. Qofka Sinada Sameeya
Gaar ahaan kuwa ku faana ama u bareera dambigan weyn. Sinadu waxay keentaa in barakadu ka tagto qofka, Allena uu u caroodo.
8. Qofka Beenta ku Dhaarta
Gaar ahaan marka loogu dhaaranaayo si loogu dhaco hanti qof kale leeyahay. Dhaartani waxay qofka dhaxalsiisaa carada Alle iyo naar labadaba
9. Qofka Ribada Cuna
Alle iyo Rasuulkiisu waxay ku dhawaaqeen dagaal ka dhan ah qofka ribada ku shaqaysta. Dagaalka Allena waa mid aan laga guulaysan karin.
10. Qofka u bareera Dambiga
Qofka dambiga sameeya isagoo og, haddana dadka kale u sheega ama ku faana (la jahra). Alle wuxuu u naxariisataa kuwa dambiga qariya ee toobad keena, laakiin wuxuu u caroodaa kuwa ku faana ee aan ka xishoon dambiga
